10 October 2001 kee baat hai. Main apne ghar thaka haara lauta. Man kuchh ashaant tha. Chah kar bhi jab neend nahin aa rahee thee, toh apni padhai kee mez par baithh kar kuchh chitra banane laga. Sahsa hee Madhushala kee kuchh panktiyan smriti mein ubhar aayeen aur anayaas hee mere haath ek naye kavya sangraha kee rachna karne lage. Aaj Madiralay 65 rubayiyon ka ek kavya sangraha ho chuka hai. Yeh meri chhoti see bhent hai us mahan rachnakaar ko jisne apni kalam aur roshnayi se asankhya bhaartiyon kee atma par apna naam ankit kiya hai !

MADIRALAY

Bahut dino ke baad mile ho,

Itne din tak kahan rahe?

Yaad mujhe bhi karte the kya,

Jahan gaye the jahan rahe?

Haal tumhara poochhunga sab

Par pehle vishram karo

Shaam dhale fir aaj chalenge,

Hum tum dono Madiralay!

 *

 Tum bin jeevan ras pheeka tha

Aashayein bhi dabi dabi.

Hasya vinod sabhi jhoothe the,

Sangi saathi vyartha sabhi.

Jab bhi tumko yaad kiya

Aur aankhein bharne ko aayeen

Mere sammukh marg ek tha

Joh Jaata tha Madiralay!

 *

Aankhon mein thee pyas milan kee

Geet virah ke gaata tha.

Jis dish dekhein netra usi dish,

Roop tumhara paata tha.

Tum kya roothe jeevan rootha,

Jeevan kee aasha roothi.

Ek bachi bas yaad tumhari,

Ek bacha bas Madiralay!

*

Madira kee paavan vaitarni

Mujhko paas bulati thee,

Kashts hriday ka har leti thee,

Hans kar gale lagati thee.

Kehti thee “Yeh snehalingan,

Tum par vaaroon nitya priye,

Bahupaash mein mujhko bhar lo

Aakar ke tum Madiralay! ”

*

 Ek roz pran baandh chala main,

Aaj khoj hee chhodunga.

Maryada kee seemaon ko

Dridha sankalp se todunga.

Rok sake toh rok le mujhko

Dekhun kya karta hai Jag?

Ab na pag peechhe modunga

Chala dhoondhne Madiralay!

*

Lok laaj samman hain jhhoothe,

Jhhothi prem pipasha hai.

Aan maan maryada jhhoothi,

Jhhoothi har abhilasha hai.

Jhhootha jag ka sang, hain jhhoothe

Sangi saathi sehwasi.

Jhhoothhi ichchaa, jhhootha jeevan,

Ek na jhhootha Madiralay!

*

Tumse baat chhipani kaisee?

Aaj bol hee deta hoon!

Jis par saadhe maun raha woh

Bhed khol hee deta hoon.

Yauvan jaise sura, adhar ghat,

Prem tumhara masti hai.

Tum hee saakibala priyatam,

Tum hee mera Madiralay!

*

Yeh lavanyamayi kad kaya

Uspar roop chhavi sundar.

Kesh hain jaise saandhya kaalima,

Netra suramrit ratnakar.

Na tum jaisa madhur, na koi

Tumsa maadak aur priye.

Aur jagat mein kaun bhala hai

Tumse badhkar Madiralay?

*

Pushp-maal mandir mein chadhte

Madiralay mein pyala hai.

Wahan sajein aaradhya deviyan,

Yahan pe saakibala hai.

Mantra padhein mandir mein, goonje

Yahan madir geeton ke swar.

Wahan pe royein pandit, naache

Yahan khushi se Madiralay!

*

Tum toh thehre brahma upasak,

Main madira peene waala.

Tumko pyare ved aur geeta,

Mujhko pyara hai pyala.

Tum poojo shivling, main poojun

Pyale aur suraghat ko.

Jaise tum mandir jaate ho,

Main jaata hoon Madiralay!

*